الأحد، 1 سبتمبر 2013

رسالة من شهيد

علَى دايما فى الهتاف
دا احنا كنا بنبقى ميه
صوتنا أعلى من الآف
اوعى تيأس يابنى يوم
اصحى يلا قوام و قوم
اطرد الخوف من فؤادك
منك الخوف راح يخاف
     *  *  *
يابنى دا انت أمل بلادك
مهما حاولوا يسمموه
و انت صوت الحق مهما
يوم يحاولوا يكمموه
انت بكره و انت بعده
انت فكره..انت حلم
هيبقى عايش مهما حاولوا
يقتلوه !
انت قلب وطن بلادك
انت ابنه..لأ أبوه !
     *  *  *
انت كل ما فيها لك
اوعى ينتابك فى لحظه
أى شك..
كل رملة أرض سينا
يابنى لك
كل نخله فى ارض سيوه
كل شجرة توت بتطرح
كل قصر و كل خيمه
كل شبر و كل مطرح
كل غنوه تقولك افرح...
كل شارع  او زقاق
كل بيت لك فيه رفاق
مية النيل اللى جاريه
و المراكب فيها سايره
و الميدان على شكل دايره
برضه لك !
   *  *  *
لك سماها و أرضها
انت احسن حد أدى
فى البلد دى فرضها
انت ناتج بعد جمع
و طرح قسمة ضربها
انت من خاض حربها
ما أنبلك؟!
   *  *  *
صوت هتافك أقوى يابنى
من الرصاص
دمى ويا هتاف فى جوفك
هما دول سر الخلاص..
هما دول سر الخلاص !  

الأربعاء، 6 مارس 2013

لا عساكر و لا اخوان

لو يحصل مهما يحصل
أنا عمرى فى يوم ما هنزل
أهتف ياعسكر انزل
و احكم بلادى تانى
ولا عمرى فى يوم راح انزل
أقول يا ظلم ارجع
و لا يمكن تانى هقبل
ببياده تدوس عليا
و لا عمرى فى يوم
راح أخضع
و لا عمرى فى يوم
راح أركع
لمستبد تانى
ولا عمرى هسيب كلابكم
يسرقوا منا الأمانى
و لا عمرى فى يوم هوافق
لنظام كداب منافق
يحكمنى ليوم زياده
بإسم الدين و العباده
ولا عمرى فى يوم هأمن
لنظام يحكمنى خاين
و ان كنت فى يوم هراهن
مين هيوصل بلادى
للعدل و الأمان
يبقى أكيد الرهان
على شعبى المناضل
اللى بطول الزمان
ياما اتحمل و أسى
لكنه فى النهايه
عمره ماباع القضيه
عمره ماباع الحكايه
عمره ما سلم و لان
و ان كان فى العمر باقى
راح أقول و أهتف و أنادى
يسقط كل اللى فاكر
انه هيورث بلادى
يسقط حكم العساكر
يسقط كل اللى تاجر
بالدين لأجل الكراسى
يسقط كل اللى ناسى
انك ياشعبى قادر
تُسقط أى نظام
تُسقط كل اللى خانك
تُسقط كل اللى باعك
تُسقط كل اللى خان
تُسقط كل اللى خان ! 

الخميس، 14 فبراير 2013

أنا الشعب و على إيدى نهايتكم ..

و جاى تسألنى :
مين انت و مين بتكون؟؟
أنا أقولك !
أنا اللى اخترت حضراتكم
بعصر لمون!
أنا جيكا..أنا الجندى..أنا كريستى
أنا المطحون..
أنا المقتول..
أنا المسحول
أنا المجنون لأنى اخترت أمثالكم
أنا اللى اخترت جلادى
أنا اللى صنعت فرعونكم
و عادى هموت فدا بلادى
لكنى مش هسيبهالكم
سوا عايش .. سوا ميت
هطاردكم كما الأشباح
فى تفكيركم..فى احلامكم
ولا هسيبك فى يوم ترتاح
انا لو تعرفوا انى
على ايدي نهايتكم !
     * * *
و جاى تسألنى مين أنتم؟؟
أنا أقولك :
أنا الشعب اللى كفرتوه
بأوطانه و أديانه
بأفعالكم و أقوالكم
أنا الشعب اللى سايل دمه
فى الميادين
و يكفينى شرف انى
لا عمرى فى يوم تاجرت بدم
و لا عمرى تاجرت بدين
و لا عمرى تاجرت بغزه و فلسطين
و بحمد ربنا انى ..
لا انا "شاطر" فى أنظاركم
و لا "عريان" !
و لا واحد من الخرفان
و برضه كمان هقولهالكم
لا أنا جبهه و لا دستور
لا ليبرالى و لا شيوعى
لا أنا ناشط و لا حزبى
لا انا موسى و لا برادعى
و لا حمدين.
أنا لو كنتوا مش عارفين
أنا اللى جلدت جلادكم
أنا لو تعرفوا انى
على ايدي نهايتكم !
* * *
عايز تعرف كمان انا مين؟؟
أنا من جيل "جابر جيكا صلاح الدين"
انا عيل فى أنظاركم
أنا مواليد حاجه و تسعين
و لو كنتم قدر لينا فأنا قدركم
* * *
عايز تعرف كمان انا مين؟؟
انا اللى حلفت ألف يمين
بأنى فى يوم هحرر
أرض اوطانى من الخاينين
و أرجعكم كما كنتم..
تعيشوا فى عتمة الزنازين !
أنا لو تعرفوا انى..
أنا الشعب و على ايدى نهايتكم !

السبت، 19 يناير 2013

راجعين..

يـللى خـطـفتوا الـورد
   م البساتين
يـللـى سرقتوا الثـورة
   م المـياديـن
يـللـى خدعتوا الـنـاس
    بــإسم الدين
اوعوا تفتكروا اننا ..
 مــمـكن هـنسكت
لا ياسيدى الثورة لسـه مكمله
  و ادى الشباب راجعين
    *   *   *
أيوه انت "شاطر" أه
لكنه كان أشطر
أيوه انتو ماشى كتير
لكنه كان أكتر
هتقولى ميليشياتك؟؟
كان نفعه يوم عسكر
و ادى نهايته أهوه..
فى عتمة الزنازين
     *   *   *
وزع كمان كراسيك
  على عشيرتك
اتحكم ياعم..اتمكن..
   كمان سيطر
أقتل كمان جيكا
اقتل كمان مليون
ماهو اللى يقتل مره..
الدم عنده يهون
و اعمل مايبدو إليك..
لكن عليك تفهم
ان الميدان موجود
و ان الشباب راجعين
       *   *   *
و نصحتكم مره..
  قلتلكم "أعتبرو"
لا شوفت انا عبره
و لا خدتوا بنصيحتى
على درب سابقكم ..
أنا شوفتكم ماشيين
واضح كده ان انتو
بتكملوا مسيرته
و احنا كمان برضه..
للثورة مكملين
أخر كلامى ليكم
ياساده لو فاهمين:
 أدى يناير جه
    و ادى الشباب راجعين!

الثلاثاء، 15 يناير 2013

الموت فى بلادى ..

و ف بلادى ناس غلابه..
أسمى أمانيهم"رغيف" ..
ناس و عايشيين ع الرصيف..
ناس غلابه ولولا هما..
الوطن يصبح ضعيييف!..
و ف بلادى الدم اصبح..
شئ رخيص ..
النظام يقتل و يدبح..
 و المعارضه ــ شئ أساسى ــ..
لازم تهيص 
و ف بلادى الموت
فى لحظه..
الموت فى مركب..
و ف بلادى الموت
ينادى ع المحطه:
مين هيجى..
مين هيركب؟؟
و ف بلادى
الموت دا أصبح..
 أمر عادى!..
و ف بلادى الموت
رصاصة عسكرى
فى قلب المظاهره
و ف بلادى نموت
بغيظنا..
نموت بقهره
و ف بلادى كل بيت
بقى فيه شهيد
و ف بلادى أم مينا
أم خالد..
او ولاد الشيخ عماد
كل دول عايشين
فى حسره
و ف بلادى الفكر تهمه
و العقول باتت محاصره
و ف بلادى طامه كبرى
دقن حاكمانا و بياده
و ف بلادى كل شئ
أصبح فى ناقص
إلا اهانتنا بزياده

و ف بلادى "السحل" دا
بقى زى عاده
و ف بلادى
فهموا اخواتنا العساكر
ان تعذيبنا عباده ! 

و ف بلادى الموت نظام .. 
و النظام ف بلادى موت ..
شعب و أتعود خلاص ..
فالطبيعى رد فعله يكون
    ســكـــوت !

الأحد، 23 ديسمبر 2012

يا عيون حبيبتى ..

يا عيون حبيبتى..
انا جيتلك .. و هحكيلك..
انا المهموم..و هشكيلك
هموم قلبى..
و هتكلم ولا اخبى..
يا عيون حبيبتى! 
  * * *
انا العاشق
و جيت علشان أصليلك..
وأطوف حوالين
سواد عينك..
و أهديكى كلام شعرى..
و أغنيلك مواويلى..
  يا عيون حبيبتى!   
* * *
 انا اللى بموت 
و انا مستنى لقياكى ..
و كام يحيينى رؤياكى..
انا اللى تملى بهواكى ..
و لا أقدر..
فى يوم ياحبيبتى انساكى
* * *
و انا اللى كتير .. 
سهرت الليل .. وبكتبلك:
اعشقينى و موتى فيا..
و حبينى و انا احبك..
خلى قلبك كله ليا..
و موتى فيا..
ياعيون حبيبتى!

السبت، 15 ديسمبر 2012

كان و مازال !

كان يــا ما كان ..
كان فيه زمان شيخ محترم ..
نادى بعلو الصوت هتف..
ضد الفساد..
نادى بشنق الجلادين ..
نادى بحق المسجونين..
و عشان كده..
راحوا العساكر فجأه داسوا ع الزناد..
قتلوا الشهيد الشيخ عماد !
         *  *  *
كان يــا ما كان..
كان فيه زمان دكتور جدع..
نادى بعلو الصوت هتف..
ضد النظام..
نازل يقف ويا رفاقه فى الميدان..
نازل يقف ضد اللى خان..
ضد الجبان ..
ضد السكوت ع الاعتداء..
و عشان كده..
راحوا العساكر اطلقوا نار الغباء..
قتلوا الشهيد دكتور علاء !
       *  *  *
كان يــا ما كان ..
كان و مازال فيه ثورة صامده فى الشوارع..
كان و مازال ما يهمهاش ضرب المدافع..
كان و مازال و مكمله أفديها بدمايه..
كان و مازال و مكمله حتى النهايه!
        نهايتكم انتوا !