جات يناير ..

فاكر انت أيام يناير..
لما كان الشعب ثاير..
لما مره الشعب فاق..
ولكرامته و مجده داق
شاف إشاره من السما بتناديله من جديد:
 "يللا انزل موت شهيد"
كل حاجة ليها طعم حتى انفاسى وسكوتى
كانت أحلى أيام ف عمرى
كنت بمشى فى الميدان مستنى موتى
و مُستعد..
لما جت إيديك على إيديا تشد وتواسينى :
"يابنى اصبر..
انت فاكر بالحياه بس هتحرر بلادك؟
مصر ممكن تبقى حره
لو نويت تهديها روحك
لو نويت تموت شهيد .. تبقى ذكرى ف عين ولادك"
فاكر انت أيام يناير لما كنا صف واحد..
لما مينا صلى جنبك و أنت صليت جنب مينا؟!..
لما شبهنا ميداننا بالسفينه؟..
إما نغرق كلنا أو فـ النهايه هترسى بينا..
فاكر انت لما أقسمنا يمين:
"أقسم بالله العظيم،أن أحافظ ع البلد دى مهما كان"
فاكر انت لما قالوا علينا حبة أمريكان ،
مُمولين ، و مُدربين ومُخربين؟
فاكر انت لما كان الظلم زاد؟؟..
و الكلاب نهبوا البلاد..
ظلموا العباد..
قتلوا الولاد..
لما ربك يوم أراد..
ينتهى بينا الفساد..
جات يناير !