يا عيون حبيبتى ..

يا عيون حبيبتى..
انا جيتلك .. و هحكيلك..
انا المهموم..و هشكيلك
هموم قلبى..
و هتكلم ولا اخبى..

يا عيون حبيبتى! 
  * * *

انا العاشق
و جيت علشان أصليلك..
وأطوف حوالين
سواد عينك..
و أهديكى كلام شعرى..
و أغنيلك مواويلى..
  يا عيون حبيبتى!   

* * *
 انا اللى بموت 
و انا مستنى لقياكى ..
و كام يحيينى رؤياكى..
انا اللى تملى بهواكى ..
و لا أقدر..

فى يوم ياحبيبتى انساكى

* * *
و انا اللى كتير .. 
سهرت الليل .. وبكتبلك:
اعشقينى و موتى فيا..
و حبينى و انا احبك..
خلى قلبك كله ليا..
و موتى فيا..

ياعيون حبيبتى!

كان و مازال !

كان يــا ما كان ..

كان فيه زمان شيخ محترم ..

نادى بعلو الصوت هتف..

ضد الفساد..

نادى بشنق الجلادين ..

نادى بحق المسجونين..

و عشان كده..

راحوا العساكر فجأه داسوا ع الزناد..

قتلوا الشهيد الشيخ عماد !

         *  *  *

كان يــا ما كان..

كان فيه زمان دكتور جدع..

نادى بعلو الصوت هتف..

ضد النظام..

نازل يقف ويا رفاقه فى الميدان..

نازل يقف ضد اللى خان..

ضد الجبان ..

ضد السكوت ع الاعتداء..

و عشان كده..

راحوا العساكر اطلقوا نار الغباء..

قتلوا الشهيد دكتور علاء !

       *  *  *

كان يــا ما كان ..

كان و مازال فيه ثورة صامده فى الشوارع..

كان و مازال ما يهمهاش ضرب المدافع..

كان و مازال و مكمله أفديها بدمايه..

كان و مازال و مكمله حتى النهايه!

        نهايتكم انتوا !

خان .. يخون .. اذا اخوان..

 فاكر يابنى لما سابونا..

لما باعونا فى الميدان؟؟

لما أباحوا دم الشهدا..لاجل الكرسى..

و قالوا كمان ..

ان مظاهراتنا دى مؤامره..

و ان مفيش شرعية لثوره..

و ان خلاص هم الشرعيه؟!

ليه جايين دلوقتى بنهتف:

    "بيع يابديع"

اصلا كل ما ليهم فيها.. باعه زمان..

لما اتحالف ويا العسكر ضد الثوره..

لما فى يوم الخاين خان

دا الاخوان اصلا كاذبون..

و كمان بينافقوا..

فاكر لما بديع يوم قال..

انه موافق ع التوريث للى اسمه جمال؟؟

طيب شوف ياسيادة المرشد..

اكدب ماشى..طلَع ميليشياتك تقتل..

لكن افهم..

بكره هيجى اكيد و تغور ..

عندك حسنى مبارك عبره..

و انت عليك يا بديع الدور!